مافيش مستحيل عند الهنا يسوع المسيح

كتب الأخ الفاضل/ ا . ح – أستراليا

عشت اكتر من تلاتين سنة من عمري في مصر لم اسمع خلالها عن قدس ابونا عبد المسيح ..
وكانت اول مرة اسمع عنة بعد عدة سنوات في المهجر لما رايت كتب معجزاتة في مكتبة الكنيسة وسمعت ناس بتحكي عنة وعن قوة شفاعتة، اهداني صديق كتابين وقال لي اقراهم وانت هاتعرف انة قديس قوي الشفاعة جدا رغم بساطتة وكان فيهم نبذة عن قصة حياتة وفعلا قراتهم وفرحت بمعرفة قديس اخر في كنيستنا الجميلة.

وانشغلت في امور الدنيا مرة تانية وفي لحظات ضيق من ظروف المعيشة وضيق ذات اليد مع اسرتي الصغيرة وقفت اصلي لربنا اطلب منة يساعدني ويقويني فقد كنا في مرحلة انا بس اللي بشتغل ودخلي محدود ولجوئنا لاستعمال الكريدت كارد وضع فوق رؤسنا ديون كتير كنا عايشين فقط نحاول نسددها وفي وسط دة كلة اطفالنا كانوا بيكبروا وابتدوا يسالونا احنا لية مش شاريين بيت زي كل الناس اللي نعرفهم من جوايا كان نفسي احقق لهم دة بس واقعنا بيقول دة هو رابع المستحيلات.

يا اخواتي في المسيح كلكم تعرفوا ان الدخول في قرض منزلي لة مستلزمات منها ان يكون لك ولو بعض المدخرات في البنك والا توجد عليك ديون كبيرة وان يتوفر لديك الاموال اللازمة لسداد المقدم والرسوم وغيرة واحنا لا يتوافر لدينا اي شرط منها بل والاسوا كنا تحت وطاة ديون اكبر من امكانياتنا بكتير.

وانا اصلي لقيت نفسي افتكرت قدس ابونا عبد المسيح ولقيت نفسي بحط قدامة العقدة في المنشار بحسب ضعفي وتفكيري البشري فكنت اطلب شفاعتة لاول مرة في حياتي في شئ هو بالنسبة لي تعجيزي وقلت لة من فضلك يا قدس ابونا اشفع فينا في المشكلة دي لو كان فيها خير.
من جوايا كنت حاسس اني مش مفروض اني احط ابونا القديس في مشكلة مالهاش حل وانا عامد متعمد ربنا يغفر لي كنت بضعفي حزين ان اضع قديسنا في موقف زي دة !!

بعد حوالي شهر ونص يا اخواتي قابلت انسان في الطريق هو صديق واحد صديقي ونعرف بعض بالشكل فقط سلمت علية ودردشنا شوية مع بعض ولقيتة بيسالني انت شاري ولا مؤجر؟؟ قلت لة اننا مؤجرين لان ظروفنا ما تسمحش والعملية ماشية بالعافية بسبب الديون!!! لقيتة بيقول لي : لا لا لا الديون دي مقدور عليها وانت الفلوس اللي بتدفعها في الايجار كتيرة ولو كملت عليها حاجة بسيطة تدفع قسط بيت وتبقي بتدفع في حاجة بتاعتك بدل ما الايجار دة كلة فلوس رايحة في ملك غيرك، اسمع احنا نتقابل بكرة وهانروح سوا للبنك انا هاسلفك مبلغ الديون تسددها وهاسلفك فلوس المقدم ونعمل طلب قرض منزلي وان شاء ربنا كلة هايبقي زي الفل ولما تبقوا في ظروف كويسة ابقي سدد لي !!!!

يا اخواتي ولاد الملك انا كنت أسمعه يتكلم وشايف اللة يتمجد في قديسنا قوي الشفاعة وانا مذهول وعاجز عن ان احتوي قوة وقدرة ورحمة الهنا القوي القادر علي كل شئ وهي تتجلي لنا في شفاعة اناسة القديسين.

وبالفعل حدث كل ما قالة بالحرف واشترينا منزل !!!

ارجوك يا ابونا القديس عظيم الشفاعة قدس ابونا عبد المسيح تسامحني علي التاخير في كتابة شهادتي هذة وتذكرنا انا واسرتي امام عرش النعمة يا ابونا عشان ربنا يسامحني علي ضعفي في التفكير في قدرتة الغير محدودة بحسب تفكيري المحدود وارجوك يا ابي القديس ان تبارك حياة هذا الانسان اللي ساعدنا هو واسرتة بكل بركة روحية وارضية فهو قدم لنا المسيح بكل محبتة وعطاؤة واتضاعة.

المجد لاسمك ايها المسيح الهنا وبركة وشفاعة قديسيك تكون معنا وحولنا جميعا الي الابد امين.